Ўзмиллийбанк Қорақалпоғистон Республикасида жойлашган цемент заводини сотувга чиқарди. Бу ҳақда E-auksion порталида эълон жойлаштирилган.

Завод Қораўзак туманида жойлашган. Ер участкасининг жами майдони 22,84 гектарни ташкил қилади. Бинонинг умумий майдони 31,3 минг кв. метр бўлиб, 2018 йилда қурилган.

Савдога бетон заводи биноси ва ускуналари мулкий мажмуа сифатида чиқарилган. Бино ва иншоотларнинг 3 та кадастри бирлаштирилиб савдога чиқарилган.

Лотнинг бошланғич нархи 120,9 млрд сўмга тенг. Бундан ташқари, мазкур лот қўшимча 96,9 млрд сўмлик қўшимча мажбурият билан сотувга чиқарилган. Аукцион 3 апрель куни соат 10:00 да бошланади.

Завод ҳақида

Мазкур бино-иншоотлар "Титан Цемент" МЧЖга қарашли бўлган. Мазкур компания хитойлик инвестор билан биргаликда, 2018 йилда цемент заводини ишга туширган. Лойиҳа қиймати 302,4 млрд сўмни ёки 37,8 млн долларни ташкил қилиши айтилган. Қўшма корхона ушбу лойиҳани амалга ошириш учун 19,2 млн доллар сармоя киритди ва 16,8 млн доллар кредит, шунингдек, 1,8 млн доллар хорижий инвестиция жалб қилган. Завод йилига 200 минг тонна цемент ишлаб чиқариши прогноз қилинган.

Статистика қўмитаси маълумотларига кўра, "Титан Цемент" МЧЖ айни пайтда фаолият кўрсатмаётгани қайд этилган.