Octobank фирибгарлар томонидан энг кенг тарқалган алдов усуллари ҳақида сўзлаб берувчи, уларнинг аломатларини танишни ўргатадиган ҳамда молиявий ва шахсий маълумотларни қандай ҳимоя қилиш бўйича амалий маслаҳатлар берадиган материаллар туркумини ишга туширмоқда.

Фирибгарлар банк мижозларини алдаш учун сунъий интеллектдан фойдаланишмоқда

1. Telegram-аккаунтни ўзлаштириб олиш

— Фирибгарлар .апк кенгайтмаси ва фойдаланувчини уларни очишга ундаши мумкин бўлган иборалар ёзилган файлларни юборадилар. Кўпинча бу "Салом, суратдаги сенмисан?" деган матнли хабар. Стилер-вирус (зарарли дастурий таъминот) фирибгарларга қурилмага, шу жумладан SMS хабарларга, қўнғироқлар, контактлар, галерея ва бошқа таъсирчан маълумотларга тўлиқ кириш имконини беради, бу эса фойдаланувчини ҳамда унинг банк ва бошқа иловаларини кейинчалик компрометация қилишга имкон беради.

— Қурилма муваффақиятли компрометация қилингандан сўнг, бузғунчилар чатлар ва барча овозли хабарларга кириш ҳуқуқига эга бўладилар, жабрланувчининг аккаунтига кириш учун бузғунчилар булутли паролни ўрнатадилар ва қурбоннинг барча фаол сеансларини якунлайдилар. 

2. Қалбаки овоз яратиш

— Овозли хабарлар ёзувларини олгандан сўнг, фирибгарлар сунъий интеллектдан фойдаланиб, жабрланувчининг овози ва нутқ услубини тақлид қилувчи сохта овоз яратадилар.

3. Жабрланувчининг қариндош ва дўстларини алдаш

— Фирибгарлар жабрланувчининг қариндошлари ёки дўстларига қўнғироқ қилади ёки Telegram'дан хабар ёзади.

— Олдиндан тайёрланган овозли иборалардан фойдаланадилар, масалан: "Менга шошилинч пул керак, ёрдам қилинг" ёки "Муаммога дуч келдим, мана шу ҳисоб рақамига пул ўтказинг".

— Аввалги ёзишмаларни таҳлил қилиш орқали мулоқот услубини ҳисобга олади.

4. Сохта видео-қўнғироқлар

— Юқори малакали фирибгарлар реал вақт режимида дипфейклардан фойдаланиб, жабрланувчининг олдин чатда ёзилган юзи ва овозли хабарларини синхронлаши мумкин.

— Мессенжерлар орқали қалбаки видео-қўнғироқлар амалга оширилмоқда. Уларда сунъий интеллект олдиндан ёзиб олинган ибораларга мос равишда лаб ҳаракатларини ва юз ифодаларини мослаштирмоқда.

Сунъий интеллект фирибгарлигидан қандай ҳимояланиш мумкин?

— Овозли хабарлар ва қўнғироқларга эътиборли бўлинг: агар сиздан зудлик билан пул ўтказиш сўралса, албатта маълумотларни қайта текширинг.

— Telegram'да икки босқичли аутентификацияни созланг ва мураккаб пароллардан фойдаланинг.

— Нотаниш манбалардан файл ва иловаларни юклаб олманг, ҳатто уларни дўстингиз юборган бўлса ҳам.

— Банк ва яқинларингизнинг расмий контактларини сақлаб қўйинг, пул юборишдан олдин рақам ва маълумотларни солиштиринг.

— Овоз ва мулоқот услубини текширинг: агар сизга "таниш" инсон ёзса ёки қўнғироқ қилса, лекин сизга хос бўлмаган ибораларни айтса ёки ўзини ғалати тутса, бу фирибгар бўлиши мумкин.

Бу Octobankдан фирибгарлик ҳақида тайёрланган материаллар туркумидаги схемалардан бири ҳисобланади. Кейинги сонларда банк фирибгарликнинг бошқа усулларини таҳлил қилади, фирибгарларни дастлабки босқичдаёқ қандай аниқлаш мумкинлигини тушунтиради ва одамларни молиявий йўқотишлардан қандай ҳимоя қилиш йўлларини кўрсатиб беради.