Аёлларга сайловда иштирок этиш ҳуқуқи берилгани, гендер тенглиги ўрнатилганига ҳали унча кўп вақт бўлмади, бироқ шу 100 йил ичида кўплаб аёллар катта ишларга қодир эканини исботлаб улгурди. Жумладан, бугунги кунда муваффақиятли аёллар дунё банк-молия соҳасида етакчига айланиб, йирик мамлакатларнинг Марказий банкига раҳбарлик қилиб келмоқда. Bankers.uz нашри дунё Марказий банкларини бошқараётган аёллар ҳақида ҳикоя қилади.

Европа Марказий банки раиси Кристина Лагард (Christine Lagarde)

^{Фото: CNN}

Кристина Лагард — молия оламидаги энг таниқли аёл, дунёнинг энг нуфузли молиявий ташкилотларидан иккитасига: Халқаро валюта жамғармаси ва Европа Марказий банкига раҳбарлик қилган тарихий шахсдир. У 2019 йилнинг ноябр ойидан буён Европа Иттифоқи Марказий банкини бошқариб келади. К.Лагард 1956 йилда Францияда туғилган. 2005–2007 йилларда Франция Савдо вазири, 2007 йилда Агросаноат ва балиқчилик вазири, 2007–2011 йилларда Иқтисодиёт ва молия вазири бўлган.

Россия Марказий банки раиси Элвира Набиуллина

^{Фото: РБК}

Элвира Набиуллина — Россия тарихида Марказий банк раиси бўлган биринчи аёл. У 2013 йилдан буён Россия Марказий банки (Банк России)ни бошқариб келмоқда. Набиуллина 1963 йилда Бошқирдистонда туғилган. Москва давлат университетининг иқтисодиёт факультетини тамомлаган. 2007 йилда РФ Иқтисодий ривожланиш ва савдо вазири, 2008 йилда Иқтисодий ривожланиш вазири, 2012–2013 йилларда Россия Федерацияси Президентининг ёрдамчиси бўлган.

“Bloomberg” нашри колумнисти Марк Чемпион Элвира Набиуллинани дунёнинг энг яхши банкирларидан бири деб атади. Унинг таъкидлашича, мамлакат иқтисодиёти Россияга қарши кўплаб санкциялар фонида кўпчилик кутган пасайиш ўрнига ўсишни кўрсатди. Набиуллинанинг қаҳрамонликларидан яна бири – 2014 йилда Россия миллий валютаси рублни эркин сузувчи курсга ўтказгани бўлди.

Австралия резерв банки раиси Мишел Буллок (Michele Bullock)

^{Фото: Bloomberg}

Мишел Буллок — Австралия Марказий банки раиси (биринчи аёл раис). У 2023 йилнинг сентябр ойидан эътиборан Австралия резерв банки губернатори (раиси) сифатида фаолият юритиб келмоқда.

У 1962 йилда Австралияда туғилган. Нью-Ингленд университетида бакалавр, Австралия Миллий университетида магистратура босқичида таҳсил олган. 1985 йилдан Австралия резерв банкида иш бошлаган. Мишел Буллок Австралия Марказий банкига қийин даврда раҳбарликка келди ва инфляцияни 5,4 фоиздан 4,1 фоизга тушира олди.

Норвегия Марказий банки губернатори Ида Вольден Бах (Ida Wolden Bache)

^{Фото: Norges Bank}

Ида Вольден Бах Норвегия Марказий банкига раҳбарлик қилган биринчи аёл. У 1973 йил 26 февралда туғилган. Ида Вольден 2022 йилдан бери Норвегия Марказий банки Norges Bank губернатори сифатида ишлаб келмоқда. Осло университетида PhD даражасини олган. Банк соҳасида 27 йиллик тажрибага эга.

Мексика Марказий банки раиси Виктория Родригес Сеха (Victoria Rodríguez Ceja)

^{Фото: Telediario}

Виктория Родригес Сеха – Мексика тарихида Марказий банкни (Banco de México) бошқарган биринчи аёл. У 1977 йилда Мексикада туғилган. Иқтисод бўйича бакалавр ва магистрлик даражаларига эга. Виктория Родригес инфляцияга қарши қатъий сиёсат ва молиявий барқарорликни таъминлашдаги ҳаракатлари билан танилган.

Виктория Марказий банкка раис этиб тайинланган вақт — 2021 йил декабрда инфляция 7 фоиздан юқорироқ даражада эди. 2024 йил февралига келиб инфляция 4,45 фоиз даражага тушди.

Сербия Марказий банки губернатори Йоргованка Табакович

^{Фото: КосСев}

Йоргованка Табакович 1960 йилда Вучитрн шаҳрида туғилган. 1999 йилда Приштина иқтисодиёт факултетида магистрлик диссертацияси, 2008 йилда докторлик диссертациясини ёқлади. 2011 йил май ойида иқтисод фанлари номзоди илмий даражасини олди. Табакович банкдаги фаолиятини 1992 йилда бошлаган. Икки муддатга парламентнинг Молия қўмитаси раиси этиб тайинланган. 1998 йил мартидан 2000 йил октябригача Сербия ҳукуматида Иқтисодиёт ва мулкчиликни ўзгартириш вазири лавозимида ишлаган. У 2012 йил август ойидан буён Сербия Миллий банки губернатори лавозимида ишлаб келади. Financial Times'га тегишли нашр — "The Banker" губернатор Йоргованка Табаковични 2020 йилнинг энг яхши губернатори деб эълон қилган.