Россия Марказий банки раиси Элвира Набиуллина бир шахсда бўлиши мумкин бўлган карталар сонини чеклаш ҳақида президент Путинга таклиф киритди. Унинг айтишича, “бу чекловлар оддий фуқароларга таъсир қилмайди, чунки оддий фуқаролар юзлаб, ҳатто минглаб карталарни очмайди. Масалан, Қозоғистондаги ҳамкасбларимиз шундай тажрибага эга” – деган Набиуллина.

Эслатиб ўтамиз, Ўзбекистонда ҳам битта жисмоний шахс учун карталар сони битта банкда 5 тагача, умумий карталар сони 20 тагача бўлиши лозимлиги борасида чеклов киритилган.

Халқаро тажрибага кўра, карталарни чиқариш ва ишлатишда деярли ҳеч қандай чекловлар мавжуд эмас. Европа Иттифоқи мамлакатларида банклар бир мижоз учун агар улар турли тизимларга тегишли бўлса (Visa, Mastercard) ёки ҳар хил турдаги (масалан, стандарт ва премиум) бўлса, бир нечта дебет карталарини чиқариш имкониятини таклиф қилади. АҚШда ҳам мижозлар айниқса, турли ҳисобларга тегишли бўлса, бир банкдан бир нечта дебет карталарини олишлари мумкин.

Шунингдек, йиғилишда Э.Набиуллина бу йилги вазифаларидан бири фирибгарлар таъсири остида шахс ўзи кредит олиб, кредит пулларини фирибгарларга ўтказадиган схемаларни блокировка қилиш эканини айтиб ўтган.

Эслатиб ўтамиз, Ўзбекистонда жисмоний шахслар ўзларининг номига кредит олишга тақиқ қўйиши мумкин бўлиши тўғрисида қонун қабул қилинган бўлиб, у 6 июндан кучга киради.