Президент томонидан имзоланган ҳужжатга кўра, Алоқабанк ёшларнинг бизнес лойиҳаларини қўллаб-қувватловчи таянч “ёшлар банки”га айлантирилади. Бу ҳақда бугун 14 февраль куни ёшлар билан бўлиб ўтган учрашувда Президент Шавкат Мирзёев маълум қилди.

Қайд этилишича, мазкур лойиҳа учун Алоқабанкка 200 млн доллар ажратилган. Банк ўзини ўзи банд қилган ёшлар лойиҳалари учун 100 млн сўмгача 7 йил муддатга имтиёзли микроқарз ажратади.

Шунингдек, якка тартибдаги тадбиркор бўлган, камида 20 нафар ёшни ишга олиб, кичик корхона очган ва ўқув маркази ташкил қилган ёш тадбиркорларга 7 йил муддатга 5 млрд сўмгача имтиёзли кредит берилиши белгиланди.

^{Фото: Президент матбуот хизмати}

Банк кредитларининг камида 30 фоизи хотин-қизлар тадбиркорлиги учун йўналтирилади.

Банк томонидан ташкил этилган “Aloqa Ventures” жамғармаси орқали стартапларга 50 мингдан 1 млн долларгача сармоя киритилиб, маҳсулот ва хизматларни ички ва халқаро бозорларда сотиш, бизнес ҳамкор топиш, қўшимча инвестициялар жалб қилишга кўмаклашилади.

Умуман олганда, тадбиркор ёшларга 2,5 млрд сўмгача имтиёзли кредитлар берилади, ташаббускор ёшларнинг стартап лойиҳаларига 2 млрд сўмгача инвестиция киритилади.

Иккинчи қарор билан олийгоҳ битирувчилари бандлигини таъминлаш бўйича янги тизим яратилмоқда. Бунинг учун Ўзмиллийбанкка 100 млн доллар ресурс берилади.

^{Фото: Президент матбуот хизмати}

Банк Олий таълим вазирлиги ва Савдо-саноат палатаси билан биргаликда олийгоҳ битирувчиларининг ташаббус ва ғояларини лойиҳага айлантириш бўйича янги банк хизматлари пакетларини жорий этади.

Шунингдек, битирувчиларни иш билан таъминлаш бўйича ҳокимлар, банк ва корхона раҳбарларидан иборат комиссия тузилади. Комиссия иш ўринларини яратиш, кадрларга эҳтиёж, бўш ўринларга ёшларни жойлаштириш масалаларини ҳал этади.