Kaspi Bank Standard & Poor's агентлиги рейтингларидан воз кечди. Бу ҳақда Forbes Kazakhstan хабар берди.

Мазкур қарор банкка яна иккита етакчи халқаро рейтинг агентликлари — Fitch ва Moody’s томонидан рейтинг берилгани ва учинчи рейтинг зарур эмаслиги билан изоҳланган. Kaspi Bank'нинг жорий кредит рейтинглари мамлакатдаги барча банклар орасида энг юқорилардан бири ҳисобланади.

Хусусан, Moody’s 2024 йил сентябрь ойида Kaspi Bank'нинг миллий ва хорижий валютадаги узоқ муддатли рейтингларини Ba1 дан Baa3 инвестиция даражасигача кўтарди. Прогноз - "Барқарор" дея баҳоланган. Қозоғистон миллий рейтинг агентлиги бўйича банк депозитларининг узоқ муддатли рейтинги - А2.kz.

Шунингдек,Fitch банк рейтингини барқарор прогнози билан BBB- инвестиция даражасигача кўтарди.

Маълумот учун, Fitch, S&P, Moody's агентликлари томонидан Ўзбекистонда 22 та банкка рейтинг берилган. Уларнинг орасида фақатгина Ўзмиллийбанк, Капиталбанк, Ипотека банк ва Асакабанкда уч хил рейтинг мавжуд. 10 та банкда S&P, 13 та банкда Fitch, 13 та банкда Moody's рейтинглари мавжуд. Бироқ, Ўзбекистон банкларидан ҳеч қайси бири инвестиция даражасидаги рейтингларни олмаган.