"ANORBANK" АЖ бошқарув раисига Музаффар Абдиназарович Сафаров тайинланди. Бу ҳақда М.Сафаров ўзининг LinkedIn саҳифасида маълум қилган. Тайинлов ҳақидаги хабарни Bankers.uz'га ANORBANK'даги вакиллар тасдиқлади.

Музаффар Сафаров 2001 йил Тошкент Давлат техника университетини бакалавр босқичини, 2005 йил Буюк Британиянинг Шеффилд университетини (The University of Sheffield) магистр босқичини тамомлаган. Шунингдек, Болтон Университетида (The University of Bolton) "PhD" даражасини олиш учун таҳсил олмоқда. М.Сафаров Корпоратив банк, инвестицияларни молиялаштириш ва хатарларни бошқариш соҳаларида 18 йилдан ортиқ тажрибага эга мутахассис ҳисобланди.

Музаффар Сафаров ўз меҳнат фаолияти давомида 2001-2002 йилларда Ўзмиллийбанк тизимида, 2005 йилдан буён Ипак Йўли Банки тизимида турли лавозимларда, хусусан, Департамент директори, 2018 йилдан 2024 йил якунига қадар бошқарув раиси ўринбосари лавозимида фаолият юритган.

М.Сафаров ANORBANK'да Халқаро молия институтлари (ХМИ) билан ишлаш, ислом молиясини ривожлантириш, замонавий маълумотлар марказини ташкил этиш ва бошқа қатор вазифаларга масъул бўлади.