“Микрокредитбанк” акциядорлик-тижорат банки ташаббуси ва Республика Оила ва хотин-қизлар қўмитаси, "Ҳамроҳ" хотин-қизлар тадбиркорлигини қўллаб-қувватлаш компанияси ҳамкорлигида Нукус шаҳрида “Орзудан муваффақиятгача…” шиори остида иккинчи хотин-қизлар форуми ўтказилди.

^{Фото: Микрокредитбанк}

^{Фото: Микрокредитбанк}

Форумда қорақалпоғистонлик тадбиркор ва ишбилармонлар, шунингдек, тадбиркорликка қизиққан 250 нафардан ортиқ хотин-қизлар иштирок этди. Тадбирда банк томонидан хотин-қизлар тадбиркорлигини молиявий қўллаб-қувватлаш ва уларнинг фаолиятини ривожлантириш борасида амалга оширилаётган ишлар ҳақида маълумот берилди.

^{Фото: Микрокредитбанк}

^{Фото: Микрокредитбанк}

2021–2024 йилларда “Микрокредитбанк” томонидан оилавий тадбиркорликни ривожлантириш дастурлари доирасида 210 мингдан ортиқ хотин-қизларга 3,7 трлн сўм имтиёзли кредитлар ажратилгани таъкидланди. Шу жумладан, Қорақалпоғистонда 19 мингга яқин хотин-қизлар учун 267 млрд сўм кредит йўналтирилган.

^{Фото: Микрокредитбанк}

^{Фото: Микрокредитбанк}

Хусусан, Нукус шаҳрида “Қоскөл” маҳалласининг 2 148 нафар аҳолиси орасида хотин-қизлар фаол тадбиркорлик билан шуғулланмоқда. Улар касаначилик, ҳунармандчилик, паррандачилик, ҳамширалик каби 15 га яқин йўналишда ўз бизнесини йўлга қўйган. Йил бошидан буён ушбу маҳаллада 92 нафар хотин-қизга банк томонидан 841 млн сўмдан ортиқ имтиёзли кредит ажратилди. Уларнинг аксарияти уйдан чиқмаган ҳолда тадбиркорликни бошлашга муваффақ бўлди.

^{Фото: Микрокредитбанк}

^{Фото: Микрокредитбанк}

Форум доирасида Чимбой туман ҳокимлиги билан ҳамкорликда “Гулистон” маҳалласининг тадбиркор аёли Мавлуда Алимбетова хонадонида амалий семинар ташкил этилди. Семинарда жиззахлик тажрибали тадбиркор, “Ўзбекистонда хизмат кўрсатган тадбиркор” Шарофат Нориева иштирок этди ва маҳалладаги 50 дан ортиқ хотин-қизга гулчилик ва деҳқончиликдан даромад топиш сирларини ўргатди.

^{Фото: Микрокредитбанк}

^{Фото: Микрокредитбанк}

Маълумот учун, бугунги кунда Ўзбекистонда иқтисодиёт ва саноат тармоқларида аёллар улуши 46 фоизни ташкил этади. Шунингдек, 120 мингдан зиёд кичик бизнес субъектларига ва 4 550 дан ортиқ фермер хўжаликларига аёллар раҳбарлик қилмоқда. Келгуси икки йилда кичик ва ўрта бизнесда хотин-қизлар улушини 25 фоиздан 40 фоизга ошириш режалаштирилган.

^{Фото: Микрокредитбанк}

^{Фото: Микрокредитбанк}

Хотин-қизларни қўллаб-қувватлашга қаратилган ташаббуслар минглаб аёлларнинг бизнес-лойиҳаларини амалга оширишга кўмаклашмоқда. Банк 2025 йилда ҳам бу йўналишдаги ишлар кўламини янада кенгайтиришни режалаштирган. Тадбиркорлик қилиш истагида бўлган хотин-қизлар фаолияти мунтазам ўрганилиб, уларга амалий ёрдам кўрсатиб борилади.

^{Фото: Микрокредитбанк}

^{Фото: Микрокредитбанк}

Эслатиб ўтамиз, “Орзудан муваффақиятгача…” форуми илк бор Бухоро шаҳрида ўтказилган эди.