Ўзбекистондаги энг йирик хусусий банклардан бири Капиталбанк, Германиянинг Helaba (Landesbank Hessen-Thüringen) банки билан 15 млн евролик савдони кредитлаш бўйича икки томонлама келишув имзолади.

Келишув битими имзоланиши 14-15 январь кунлари Вена шаҳрида бўлиб ўтаётган Euromoney 2025 халқаро иқтисодий форуми доирасида бўлиб ўтди. Бу стратегик шериклик экспорт-импорт операцияларини қўллаб-қувватлаш ва мамлакатлар ўртасидаги иқтисодий алоқаларни мустаҳкамлашга қаратилган. Келишув икки давлатда халқаро савдо лойиҳаларини амалга ошириш ва бизнесни ривожлантириш учун кредит ресурсларини тақдим этишни назарда тутади.

Битимнинг имзолангани халқаро молия институтларининг банкимизга бўлган ишончи юксак эканлигидан далолат беради. Ишончимиз комилки, Helaba банки билан ҳамкорлигимиз мижозларимизнинг ташқи иқтисодий фаолияти учун янги марраларни очиб беради ва халқаро савдони ривожлантиришга катта ҳисса қўшади, – дейди Капиталбанк бошқаруви раисининг биринчи ўринбосари Сардор Исмаилов.

Helaba билан тузилган шартнома Капиталбанкнинг жаҳон молия бозоридаги барқарор мавқеини акс эттиради. Банклар ўртасидаги шерикликни мустаҳкамлаш халқаро ҳамкорлик доирасида савдо алоқаларини кенгайтириш ва иқтисодий ўсишни рағбатлантириш йўлидаги муҳим қадамдир.

Helaba ҳақида 

Landesbank Hessen-Thüringen GZ (Helaba) — немис универсал банки бўлиб, Hessen, Турингия, Шимолий Рейн-Вестфалия ва Бранденбург Федерал Ерларида минтақавий ихтисослашган бўлиб, жамоатчилик ҳуқуқи қонунчилиги асосида ташкил этилган. 2023 йил 31 декабрь ҳолатига кўра, "Helaba"нинг жами консолидациялашган активлари 202,1 млрд еврони ташкил этди.