Asia Alliance Bank "CRIF Кредит-ахборот хизматлари" Кредит бюроси МЧЖдаги улушини сотмоқда. Бу ҳақда Корпоратив ахборот ягона порталида эълон қилинди.

Банк компаниядаги 8,74 фоиз улушини 2 млрд 81 млн сўмга сотишни режалаштирмоқда. Сотиб олиш учун бир нечта талабгор бўлган тақдирда, биринчи навбатда сўров юборган харидорда устунлик бўлиши айтилган.

"CRIF Кредит-ахборот хизматлари" (CRIF КАХ) компанияси 2020 йил май ойида Тошкент шаҳрида ташкил этилган ва Марказий банки томонидан лицензияланган ташкилот ҳисобланади.

CRIF КАХ – кредит маълумотлари, таҳлил ҳамда кредитни бошқариш учун ечимларга ихтисослашган ўзбек компанияси.

Компаниянинг устав капитали 23,8 млрд сўмдан кўпроқни ташкил қилади. CRIF KAX дастлабки ташкил топган пайтда акциядорлари орасида олтита маҳаллий тижорат банклари, хусусан, Ўзсаноатқурилишбанк, Asia Alliance Bank, InFinBank, Ипак йўли банки, Ипотека банк ва Ҳамкорбанклар бўлган. Компаниянинг 50% улуши эса италиянинг CRIF халқаро компаниясига, қолган ярми эса юқоридаги олтита банкка тегишли бўлган. Кейинчалик Ўзсаноатқурилишбанк компаниядаги 8,74 фоиз улушини CRIF халқаро компаниясига сотиши натижасида, улушдорликни тарк этган.

CRIF — бу кредит ва бизнес ахборот тизимлари, таҳлил, аутсорсинг ва процессинг хизматлари, шунингдек, бизнесни ривожлантириш ва очиқ банк иши учун рақамли ечимларга ихтисослашган глобал компания ҳисобланади. CRIF ҳозирда Европада, кредит маълумотларига иҳтисослашган етакчи компания бўлиб, тижорат ахборотлари, шунингдек кредитни бошқариш ва маркетинг соҳасида интеграциялашган хизматлар кўрсатиш бўйича дунёдаги асосий операторлардан бири ҳисобланади.

Маълумот учун, CRIF компанияси 2018 йилда "Кредит-ахборот таҳлил маркази" (КАТМ)нинг 35 фоизини сотиб олиши бўйича хабарлар тарқалганди.

^{Фото: facebook.com/tavakkalov}

Бироқ, мазкур битим амалга ошмаган ва компания тижорат банклари билан ҳамкорликда 2020 йилда янги кредит бюросини таъсис қилган.