Универсалбанк Кузатув кенгаши раиси ва акциядорларидан бири Анвар Ирчаев Инвестиция институтлари миллий уюшмаси (ИИМУ) раиси этиб тайинланди. Бу ҳақда уюшма матбуот хизмати Bankers.uz'га маълум қилди. Мазкур лавозимда шу кунга қадар (4 йилдан буён) Баҳодир Атаханов фаолият юритиб келаётганди.

Анвар Ирчаев (1977 йилда туғилган) Тошкент давлат техника университетида бакалаврни, Гамбург иқтисодиёт ва сиёсат университетида (MBA) магистратурани тамомлаган.

Меҳнат фаолияти давомида Анвар Ирчаев "Ост-Вест Альянс" суғурта компанияси вице-президенти ёрдамчиси, "Deutscher Investment Trust" МЧЖнинг мижозлар билан ишлаш ва маркетинг бўлими бошлиғи, "Dresdner Kleinwort Wasserstein" акциядорлик капитали бозорлари гуруҳи аъзоси сифатида ишлаган. Шунингдек у "Orient Capital Management" асосчиси ва директори, Универсалбанк Кузатув кенгаши раиси ва акциядорларидан бири, "Team" университети таъсисчиларидан бири ҳисобланади.

А.Ирчаев Accenture GmbH’да молиявий хизматлар ва саноат бўлимида, McKinsey & Co'да Европа молия институтлари бўлимида, шунингдек, "Dresdner Kleinwort Wasserstein" гуруҳида Equity Capital Markets бўлимида малакасини оширган.

Тадбиркор Анвар Ирчаев бундан ташқари бир неча бизнеслар эгаси бўлиб, қимматли қоғозлар бозори, шунингдек, ривожланиш стратегиясини ишлаб чиқиш ва таҳлил қилиш бўйича эксперт саналади.

Инвестиция институтлари миллий уюшмаси 2021 йил бир биридан мустақил бир нечта компаниялар томонидан ташкил этилган нодавлат-нотижорат ташкилоти ҳисобланади. Ташкилот молия бозори, шу жумладан капитал бозори фаолиятини тартибга солиш ва ривожлантириш буйича ваколатли давлат органлари билан ҳамкорликда қонун ҳужжатлар ва қоидаларни такомиллаштириш бўйича таклифлар ишлаб чиқиш ҳамда уларни кўриб чиқилишида ва қабул қилинишида қатнашади.