TBC Uzbekistan кичик ва ўрта бизнес (КЎБ) учун биринчи тўлиқ рақамли банк сервиси ─ TBC Business ишга туширилишини маълум қилди. Ушбу платформа TBC Uzbekistan технологик платформаси ва давлат хизматларининг кенг маълумотлар базаларини интеграция қилиш орқали яратилган.

Таъкидланишича, TBC Business тўлиқ рақамли рўйхатдан ўтиш жараёнининг бозорда аналоглари йўқ. Ҳисоб очиш атиги бир неча дақиқа вақт олади, маълумотларни текшириш эса автоматик тарзда амалга оширилади. Бунда мижозлардан ҳужжатларни тақдим этиш талаб қилинмайди.

Шунингдек, платформа орқали исталган вақтда коммунал ва давлат хизматлари учун тўловни бир зумда амалга ошириш, шаблонлар автоматлаштирилган ҳолда тезкор тўловлар, ходимларнинг аккаунтга кириш ҳуқуқларини созлаш ва бошқа имкониятлар мавжуд.

"Ушбу маҳсулот Ўзбекистонда кичик ва ўрта бизнесга банк хизмати кўрсатиш ҳақидаги тасаввурни бутунлай ўзгартиради. Мамлакатда биринчи бўлиб кичик ва ўрта бизнес учун тўлиқ рақамли банкингни таклиф қилар эканмиз, биз мижозларга маъмурий вазифаларга эмас, балки бизнесни ривожлантиришга эътибор қаратиш имконини берадиган самарали воситаларни тақдим этамиз”, дея таъкидлади TBC Uzbekistan бош директори Ника Курдиани.

Шунингдек, Ника курдиани бу йўналишда катта режалар борлиги, TBC Business сервисига янги имкониятлар ва хизматлар қўшиб борилишини, хусусан, келгуси йилнинг кузига қадар кичик ва ўрта бизнес учун айланма маблағларни кредитлаш хизматини йўлга қўймоқчи эканини маълум қилди.

Эслатиб ўтамиз, Анорбанк ҳам 2022 йилдан бошлаб Аnor Business интернет банки тизимини йўлга қўйган. 2024 йилда эса Anor Business ребрендинг қилинди ва бир нечта қулай имкониятлар тақдим этилди.