^{Фото: Бизнесни ривожлантириш банки}

2024 йилнинг 4 декабрь куни Бизнесни ривожлантириш банкининг Сергели банк хизматлари марказида “Аксилкоррупция ойлиги” доирасида 9 декабрь – Халқаро коррупцияга қарши курашиш кунига бағишлаб "Очиқ эшиклар куни" тадбири ўтказилди. Унда Банк Бошқаруви раҳбарияти, Коррупцияга қарши курашиш агентлиги, банк мижозлари, кенг жамоатчилик ва ОАВ вакиллари иштирок этди.

^{Фото: Бизнесни ривожлантириш банки}

Тадбирда банк тизимида коррупцияга қарши курашиш борасида амалга оширилаётган чора-тадбирлар ва уларнинг натижалари ҳақида батафсил маълумотлар берилди. Шунингдек, банкнинг Комплаенс назорати хизмати масъул ходимлари томонидан коррупцияга қарши курашиш борасида амалга оширилаётган ишлар тақдимоти ўтказилди.

Маълумки, 2024 йилнинг 6 декабрь санасидан “Манфаатлар тўқнашуви тўғрисида”ги қонун кучга киради. Бизнесни ривожлантириш банки мазкур қонун амалда татбиқ этиладиган ташкилотлар қаторидан жой олган. Банк вакиллари томонидан қонунни амалда қўллаш бўйича кўрилган чоралар ҳақида маълумот берилди.

^{Фото: Бизнесни ривожлантириш банки}

Хусусан, 2024 йилда банкнинг барча (2690 та) ходимлари манфаатлар тўқнашуви тўғрисида декларация тўлдирган. Унга кўра, манфаатлар тўқнашувига олиб келиш эҳтимоли бўлган 66 та ҳолат аниқланган, 41 нафар ходим 46 та тадбиркорлик субъектида иштирок этгани маълум бўлган. Бу бўйича 9 та ходим билан меҳнат шартномаси бекор қилингани, 16 тасининг тадбиркорлик фаолияти тугатилгани айтилди. Манфаатлар тўқнашувига йўл қўймаслик бўйича яна қўшимча чоралар кўрилаётгани маълум қилинди.

^{Фото: Бизнесни ривожлантириш банки}

Банкнинг Коррупцияга қарши курашиш махсус бошқармаси бошлиғи – Актам Ташкуловнинг таъкидлашича, ҳозирда 2 733 нафар ходим Ҳуқуқни мухофаза қилиш академияси платформасида ўқитилмоқда. Бундан ташқари, Андижон, Фарғона ва Наманган вилоятларида ташкил этилган коррупцияга қарши курашиш бўйича ўқув семинарларида барча ходимлар иштирок этган.

“Банк тизимида амалга оширилган самарали чиора-тадбирлар натижасида Бош банк, Тошкент шаҳар ҳудудий бошқармаси ва Яккасарой БХО ISO 37001:2016 халқаро сертификатига эга бўлди. Шунингдек, юқори лавозимдаги 23 нафар ходим “CERT academy”да коррупцияга қарши курашиш соҳасида махсус ўқув курсида ўқитилди. Уларга ISO 37001:2016 Коррупцияга қарши менежмент тизими халқаро сертификати берилди. ”, дея сўзини давом эттирди А.Ташкулов

Бундан ташқари, Комплаенс назорати департаментининг 18 нафар ходимида ҳам ISO 37001:2016 Коррупцияга қарши менежмент тизими халқаро сертификатлари мавжуд экани қайд этилди.

Тадбирда, шунингдек, Коррупцияга қарши курашиш агентлиги вакили Равшан Йўлдошев ҳам иштирок этиб, агентлик томонидан коррупцияга ва манфаатлар тўқнашувига қарши курашиш, манфаатлар тўқнашувининг олдини олиш борасида амалга оширилаётган ишлар тўғрисида маълумот берди.

^{Фото: Бизнесни ривожлантириш банки}

Тадбир давомида оммавий ахборот воситалари ва жамоатчилик вакиллари ўзларини қизиқтирган саволларга батафсил жавоблар олди.