Хотин-қизларнинг контракт пули тўлаб берилади — Банк-молия академияси

^{Фото: bfa.uz}

Ижтимоий тармоқларда Банк-молия академиясининг магистратура босқичида таълим олаётган хотин қизларга контракт пуллари тўлаб берилмаслиги ҳақида хабарлар тарқалди. Хусусан, 5 октябрь куни ижтимоий тармоқларда “Банк-молия академияси магистратурада ўқиётган хотин-қизлардан икки йил учун 62 млн сўм миқдорида контракт пули тўлашни сўрамоқда”, “икки йил ўқитиб, энди диплом беришмоқчи эмас” мазмунидаги турли хабарлар эълон қилинган эди. 6 октябрь куни Банк-молия академияси мазкур маълумотлар ҳақиқатда тўғри келмаслигини билдирди. 

“Аввало, хабарларда келтирилаётган икки йил учун 62 млн сўм миқдорида, дея иддао қилинаётган рақамлар ҳақиқатга тўғри келмаслигини маълум қиламиз. Чунки, Банк-молия академияси магистратура дастурлари бўйича контракт тўловлари миқдори мутахассисликлар тури ва ўқиш муддатларидан (14, 18 ой ва 2 йил) келиб чиқиб турлича ўрнатилган”, дейилади расмий муносабатда. 

Шунингдек, мазкур муносабат матнида маълум қилинишича, 2024 йил 20 сентябрь куни Олий таълим, фан ва инновациялар вазирлиги томонидан Банк-молия академиясига фақатгина қабул квоталари доирасида магистратура босқичига қабул қилинган хотин-қизларнинг контракт тўловлари давлат бюджети ҳисобидан қоплаб берилиши бўйича расмий хат йўлланган.

Ушбу хатга асосан, Академия раҳбарияти контракт тўлови давлат бюджети ҳисобидан қоплаб берилмаслиги эҳтимоли бўлган хотин-қизлар билан учрашув ўтказиб, тўловни амалга ошириш учун енгилликлар берилиши, хусусан бўлиб-бўлиб тўлаш ва тўлов муддатларни узайтириш бўйича таклифларни билдирган. 

Шундан сўнг, Банк-молия академияси вазият юзасида бугун қўшимча ахборот эълон қилди. Унда айтилишича, Вазирлар Маҳкамасининг 2022 йил 15 августдаги 447-сонли қарорига мувофиқ Академиянинг магистратура босқичида ўқиётган барча хотин-қизларнинг контракт тўловлари қайтариш шартисиз қопланиши амалиётини давом эттириш юзасидан Иқтисодиёт ва молия вазирлиги ҳамда Олий таълим, фан ва инновациялар вазирлиги билан тегишли тартибда мулоқот олиб борилди. Банк-молия академиясининг маълум қилишича, магистратура мутахассисликлари бўйича таҳсил олаётган хотин-қизлар учун контракт тўловлари белгиланган тартибда давлат бюджети ҳисобидан қоплаб берилади.