Ипотека банк янги автоматлаштирилган банк тизимига ўтади

^{Фото: Ипотека банк}

9 август куни Ипотека-банк ва Марказий банк вакиллари иштирокида учрашув бўлиб ўтди, унда ҳозирда банк томонидан фойдаланиб келинаётган автоматлаштирилган банк тизимини (ABS) янгисига алмаштириш лойиҳасини амалга оширишнинг асосий жиҳатлари муҳокама қилинди. Ушбу лойиҳа Ипотека-банк OTP Group томонидан сотиб олинганидан кейин бошланган "Gavhar" дастури доирасидаги йирик трансформациянинг бир қисмидир.

^{Фото: Ипотека банк}

Йиғилишда Марказий банк томонидан янги ABS га ўтиш жараёнларини мувофиқлаштирувчи масъул шахсларни тайинлаш, янги ABS га ўтиш бўйича Ўзбекистон қонунчилигининг талаблари, шунингдек, республикада ABS'ни сертификатлаш каби масалалар кўриб чиқилди. Шунингдек, учрашув давомида мижозлар билан мулоқот режасини ва янги тизимни синовдан ўтказиш ва ишга тушириш оралиғида меъёрий-ҳуқуқий ҳужжатларни ўзгартириш учун имтиёзлар олиш имкониятлари муҳокама қилинди.

^{Фото: Ипотека банк}

Марказий банк раҳбарияти ABSни алмаштириш лойиҳаси банкнинг операцион самарадорлиги ва мослашувчанлигини ошириш учун муҳим қадам эканлигини таъкидлади. Лойиҳани кенг миқёсдаги амалиёти жорий йилнинг май ойида бошланганлиги ва янги тизимнинг ишга туширилиши 2025 йилнинг 1 cентябрига белгиланган. Шу билан бирга, Марказий банк вакиллари банк тизимимизда флагман бўладиган мазкур лойиҳани илгари суришда Ипотека-банкни ҳар томонлама қўллаб-қувватлашга тайёр эканликларини таъкидлаган.