Июлда Ўзбекистоннинг олтин-валюта захиралари 1 млрд долларга кўпайди

Марказий банк 1 август ҳолатига Ўзбекистон Республикасининг халқаро захиралари бўйича маълумотларни тақдим қилди. Унга кўра, июль ойи давомида мамлакатнинг халқаро захиралари қолдиғи қарийб 1 млрд 62 млн.долларга кўпайган ва 37 млрд 402 млн долларга етган.

Июль ойи давомида захираларнинг валюта қисми 781,6 млн долларга қисқарган ва 7 млрд 688,2 млн долларни ташкил қилган. Олтиннинг физик ҳажми 310 минг трой унцияга кўпайиб, 12 млн 50 минг трой унцияга етган. Олтиннинг пулдаги қиймати эса 1 837,7 млн долларга ошган ва 29 156,7 млн долларга етган. Бунга асосан июль ойи давомида олтин нархи (котировкаси)ни 2327,6 доллардан 2419,6 долларгача кўтарилиши сабаб бўлган.

Иқтисодчи Отабек Бакировнинг таъкидлашича, олтин-валюта захираларининг ушбу қиймати очиқ маълумотлар мавжуд даврлардаги янги максимум ҳисобланса-да, у фақат ўртача 12 ойлик импортни қоплаш даражасига етади, холос. Иқтисодчи Ўзбекистон тарихида захираларимиз 20 ойлик импортни қоплаш даражасида бўлганини эслатиб ўтган.