Марказий Осиё банклари Россиядан тўловларни рад эта бошлади — РБК

^{Фото: Ведомости}

Июль ойида Россия корхоналарининг Марказий Осиё мамлакатларидаги банклар орқали тўловлари рад этилиши 30 фоизга ошди. Бу ҳақда РБК нашрига таяниб, "Daryo.uz" хабар берди.

Нашрнинг ёзишича, мазкур ҳолат ҳақида PEK, Digital VED, GTL ва Logita Trade транспорт компаниялари тақдим этган материалларда таъкидланган. Ушбу муаммо Қозоғистон, Қирғизистон, Ўзбекистон ва Тожикистон банкларида кузатилаётгани қайд этилган.

"Улар Россия компанияларидан таъсисчилар, мижозлар, битимлар ва маблағ манбалари каби қўшимча ҳужжатлар ва тушунтиришларни талаб қила бошладилар", - дейди PEK молиявий директори Роман Ромашевский. У 2024 йилнинг иккинчи чорагида муаммолар янада кучайганини қўшимча қилган.

Кўпинча тўловлар кечиктирилади ёки ҳеч қандай тушунтиришсиз қайтарилади. Хизмат кўрсатувчи Россия банки гап нимада эканини тушунтира олмайди, чунки муаммо чет элдаги қабул қилувчи банк томонида пайдо бўлмоқда, деди Роман Ромашевский.

Битта банкда 10 минг долларлик товарларнинг кичик партияси учун тўлов муваффақиятли ўтиши мумкин, аммо 50 минг долларлик операцияни бекор қилишмоқда, дея қўшимча қилди Logita Trade бош директори Татяна Алексеeва.

Digital Foreign Economic Activity асосчиси Анна Фомичева энг кўп муаммолар Марказий Осиё орқали Хитойга пул ўтказишда кузатилаётганини маълум қилган. “Дўст мамлакатлар” банклари орқали тўловлар билан боғлиқ муаммолар 2023 йилда юзага келган, аммо иккиламчи санкциялар таҳдиди сабабли 2024 йилда янада кучайган.

Банклар ушбу ҳолатни Россия-Украина уруши муносабати билан АҚШ томонидан киритилган санкциялар остида қолишни истамасликлари билан изоҳламоқда, дея тушунтирган "Россияни қўллаб-қувватлаш" (Опоры России) халқаро алоқалар қўмитаси раиси Николай Дунаев.