Президент Шавкат Мирзиёев 20 май куни хорижий инвестицияларни жалб қилишда банкларнинг иштирокига оид тақдимот билан танишди.

Тақдимотда Ўзмиллийбанк ҳамда Ўзсаноатқурилишбанкнинг инвестициявий фаолияти ва аҳоли бандлигидаги иштироки ҳақида мазкур банкларнинг бошқарув раислари - Алишер Мирсоатов ва Азиз Акбаржонов томонидан ахборот берилди.

^{Фото: Президент Матбуот хизмати}

Қайд этилишича, жорий йилда Миллий банк томонидан 6 миллиард долларлик лойиҳалар амалга оширилиши режалаштирилган. Шунингдек, заргарлик тармоғида 2,1 трлн сўмлик 526 та, хизматлар соҳасида 41,8 трлн сўмлик кредитлар ҳисобидан 40 мингдан ортиқ лойиҳаларни амалга ошириш ва 2,5 млн нафар аҳоли бандлигини таъминлаш кўзда тутилган.

^{Ўзмиллийбанк бошқаруви раиси Алишер Мирсоатов / Фото: Президент Матбуот хизмати}

Ўзсаноатқурилишбанк бу йил халқаро молия бозорларидан 3 млрд 100 млн долларлик маблағ жалб этишни мақсад қилган. Банк мижозлари билан умумий қиймати 4 млрд 800 млн долларлик инвестиция лойиҳаларига киришилган. Мазкур банк томонидан қурилиш материаллари соҳасида 2024-2025 йилларда 529 та лойиҳа доирасида 2 млрд 800 миллион долларлик хорижий инвестициялар жалб қилиниб, бу орқали 25 мингдан зиёд иш ўрни яратилиши режалаштирилган.

^{Ўзсаноатқурилишбанк бошқаруви раиси Азиз Акбаржонов / Фото: Президент Матбуот хизмати}

Шу билан бирга, Миллий банк 967 та, Саноатқурилишбанк 727 та маҳаллада ишсиз аҳоли бандлигини таъминлашга кўмаклашмоқда. Яна бир муҳим жиҳати, банклар қуйи бўғинга тушиб ишлаётгани учун кўплаб бизнес тузилмалар “соя”дан чиқмоқда.

Таъкидланганидек, мамлакатимиздаги қулай инвестиция муҳити натижасида банкларнинг молиявий барқарорлиги ва фаоллиги ошиб бормоқда. Хусусан, соҳадаги ислоҳотлар туфайли сўнгги 5 йилда банкларнинг капитали 2 баробарга, кредит портфели 2,3 баробарга ҳамда йиллик кредит ажратиш ҳажми 1,8 баробарга кўпайди. Тўртта банк илк бор евробонд чиқариб, четдан 1 млрд 300 млн доллар ресурс жалб этди. Ўтган йили банклар 3,8 млрд долларлик, шунингдек, уларнинг мижозлари ҳукумат кафолатисиз 6 млрд долларлик хорижий кредитларни тўғридан-тўғри олиб келган. Замон талабидан келиб чиқиб, бу ишларни янада кенгайтириш ва лойиҳаларни сифатли амалга ошириш зарурлиги айтилди.

Хусусан, мижозларнинг инвестиция лойиҳаларини тизимли мониторинг қилиб, муаммоларни тезкорлик билан ҳал этиб бориш зарурлиги қайд этилди.Тадбиркорларга туман даражасидан республика миқёсигача ҳар томонлама ёрдам бериш, уларнинг молиявий билимларини ошириш ва инновациялар билан таништириш муҳимлиги таъкидланди.