Бир нечта банк молиявий лизинг билан шуғулланувчи шўъба корхоналарни очди

Сўнгги вақтларда бир нечта банклар фаолият тури "молиявий лизинг" деб кўрсатилган шўъба корхоналарни очди. Хусусан, Халқ банки "Xalq lizing" МЧЖ, ANORBANK "ANOR ASSETS" МЧЖ ва Garant bank "GARANTINVEST" МЧЖ компанияларини таъсис этганлиги ҳақида маълумотлар Ягона корпоратив ахборот порталида пайд бўлди.

Очиқ маълумотларга кўра, АТ "Халқ банки" Кузатув кенгашининг тегишли қарорига асосан, "Xalq Lizing" МЧЖ ташкил этилган. Ташкилотнинг устав фонди 10 млрд сўм қилиб белгиланган бўлиб, Статқўм маълумотларига кўра, мазкур ташкилот фаолият тури сифатида "молиявий лизинг" кўрсатилган. Бунгача Халқ банкига бўйсунувчи хўжалик сифатида фақатгина "Xalq sug'urta" АЖ рўйхатдан ўтказилганди.

ANORBANK ҳам 7 феврал куни молиявий лизинг билан шуғулланувчи "ANOR ASSETS" МЧЖ шўъба корхонасини рўйхатдан ўтказди. Компаниянинг устав фонди 15 млрд сўм этиб белгиланган. Корхона банк фаолият олиб бораётган манзил бўйича рўйхатдан ўтган. Компания ANORBANK'нинг биринчи шўъба корхонаси ҳисобланади.

Шунингдек, Garant bank Кузатув кенгашининг 30 январдаги қарорига кўра, "молиявий лизинг" фаолият тури билан шуғулланувчи "GARANTINVEST" МЧЖ шўъба корхонасини очганлигини эълон қилди. Корхонанинг устав фонди 15 млрд сўм этиб кўрсатилган.

Эслатиб ўтамиз, 2023 йилнинг июль ойида Hayot bank томонидан ҳам айнан шу йўналишдаги "Hayot Ijara" МЧЖ шўъба корхонаси рўйхатдан ўтказилганди. Яна бир нечта банкларнинг ҳам "молиявий лизинг" фаолияти билан шуғулланувчи шўъба корхоналари мавжуд.

Аввалроқ, Рақобат қўмитаси Ўзбекистонда 12 та автомобиль лизинг компаниясига нисбатан жиноий иш қўзғатилгани ҳақида хабар берганди. Қўмитанинг маълумотларига кўра, аксарият ҳолларда корхоналар мижозлардан автомашина учун аванс олади, лекин белгиланган муддатда автомобилни етказиб бермайди ва пулни ҳам қайтармайди. Охирги бир неча йилда аҳоли томонидан 10 дан ортиқ лизинг команиялари устидан 2000 дан ортиқ мурожаатлар келиб тушган.