Ўзмиллийбанк ўзининг мобил иловаси ─ "Milliy"нинг янги версиясини яратиш учун 71 млрд сўм сарфламоқда. Банк томонидан илова яратувчилари ўртасида ўтказилган тендер XT-Xarid платформасида 5 октябрь куни якунланган. Банк бошқаруви раиси ўринбосари Б.Жалилов томонидан имзоланган техник топшириққа кўра "Milliy 3.0" деб аталувчи янги мобил илова 11 йўналиш бўйича 100 дан ортиқ техник имониятларга эга бўлиши керак. Шунингдек, илова бир нечта маълумотлар базаси, хусусан банкнинг ички дастурий таъминотлари, кредит конвейери, СМС-шлюз, тўлов тизимлари билан интеграцияланган бўлиши лозим. Ижрочи учун хизматларни кўрсатиш вақти 17 ой қилиб белгиланган.

Бошланғич суммаси қарийб 90,8 млрд сўм деб эълон қилинган тендерда учта компания иштирок этган: “ALEX information technology Servise”, ExApp L.L.C-FZ ҳамда “Full Stack Solution”. Тендер комиссияси томонидан ҳужжатларни текшириш жараёнида “ALEX information technology Servise” четлатилган, ExApp L.L.C-FZ компанияси эса 71 млрд сўм таклиф билан ғалаба қозонган. Учинчи компания - “Full Stack Solution” эса 76 млрд сўм таклифи билан захирадаги ғолиб сифатида қайд этилган.

Телеграм тармоғидаги "Gazna" канали ушбу тендердаги айрим ҳолатларга эътибор қаратган. Хусусан, тендернинг иккинчи иштирокчиси Full Stack Solution Ўзмиллийбанкка боғлиқ компаниялардан бири бўлган бўлиши мумкинлигини билдирган.

Канал муаллифининг қайд этишича, “Full Stack Solution” 2022 йил 13 апрелда ташкил этилган, ҳозирда таъсисчиси Израилбеков Шухрат Шавкатович ҳисобланади. Ташкил этилганидан бир ой ўтиб компания ўзининг илк тендерида қатнашиб, ғолиб бўлган. Қизиқ тарафи бу айнан Ўзмиллийбанкнинг деярли 560 минг долларник тендери бўлган.

"Биринчи муваффақиятдан кейин “Full Stack Solution” кейинги тендерларда “Keysoft” МЧЖ билан рақобатдош бўлишни бошлайди. “Keysoft” эса “Full Stack Solution” ташкил этилганидан бир кун ўтиб тузилган компания. Унинг раҳбари биз танийдиган Израилбеков Шухрат Шавкатович. Бир оз ўтиб бу бир бири билан боғлиқ компаниялар Ўзмиллийбанкнинг турли тендерларида ғолиб бўлишни бошлайди. Иккита тендерда ҳатто ягона рақобатдош бўлишади", Gazna телеграм канали материалидан.

^{Скриншот: stat.uz}

Ўрганишлар натижасида шу нарса маълум бўлганки, "Keysoft" МЧЖнинг 4 фоизлик улуши бевосита Ўзмиллийбанкнинг шўъба корхонаси ─ "NBU INVEST GROUP" МЧЖга тегишли. Қолган улуш эгаси ─ "EXPERA DIGITAL IT CONSULTING" эса Ўзбекистонда анча таниқли бўлишга улгурган "Expera" ва "Suntronix" айти брендларининг эгаси ҳисобланади.

^{Скриншот: stat.uz}

Шунингдек, канал муаллифи "EXPERA DIGITAL IT CONSULTING" МЧЖга аффилланган Сингапурдаги SUNTRONIX PTE. LTD. ғолиб бўлган бир нечта "шубҳали" тендерларни келтириб ўтган. Жумладан, ушбу компани 2022 йил 24 майда Ўзмиллийбанкнинг 559 минг долларлик тендерида рақиби "Full Stack Solution" билан қатнашади. Тендер протоколида SUNTRONIX PTE. LTD. ғолиб бўлган бўлса-да, лекин шартнома "Full Stack Solution" билан тузилган. Юқорида таъкидланганидек, "Full Stack Solution" МЧЖ ҳам SUNTRONIX брендининг Ўзбекистондаги эгаси "EXPERA DIGITAL IT CONSULTING" МЧЖ ҳам бевосита Израилбеков Шухрат Шавкатовичга тегишли.

^{Скриншот: stat.uz}

Эслатиб ўтамиз, Ўзмиллийбанкнинг амалдаги мобил иловаси ─ Milliy 2.0 "Play Market"да 1 миллион мартадан кўп юклаб олинган ва мутахассислар фикрича банк иловалари ўртасида барқарорлиги билан ажралиб туради. Маълумотларга кўра, ушбу илова муаллиф компанияси Ўзбекистондаги банк иловаларини ишлаб чиқиш йўналишида танилган "TUNE CONSULTING" МЧЖ ҳисобланади.

Bankers.uz интернет-нашри юқорида келтирилган ҳолатлар бўйича изоҳ беришни сўраб "Ўзмиллийбанк" АЖнинг электрон почтасига расмий сўров юборди.