Асосий/Сўнгги янгиликлар/Чинозда йирик миқдордаги имтиёзли кредит маблағлари мақсадсиз сарфланганлиги аниқланди

Чинозда йирик миқдордаги имтиёзли кредит маблағлари мақсадсиз сарфланганлиги аниқланди

Чинозда йирик миқдордаги  имтиёзли кредит маблағлари мақсадсиз сарфланганлиги аниқланди

Тошкент вилояти Чиноз туманидаги тижорат банкларидан бирининг ходими Х.А 2020-2021 йилларда 2,6 млрд. сўмлик имтиёзли кредит маблағларини нақдлаштириб берган. Давлат хавфсизлик хизматининг Тошкент вилояти бўйича бошқармаси ходимлари томонидан ўтказилган тезкор қидирув тадбирлари натижасида ушбу ҳолат маълум бўлди.

dxx_1.jpg

Фото: Kun.uz

Хусусан, Х.А. мансаб ваколатини суиистеъмол қилган ҳолда, 2020 йилда турмуш ўртоғи номига деҳқон хўжалиги ташкил этиб, уни ўзи ишлайдиган банк таъминотчиси сифатида рўйхатдан ўтказган. 

Сўнгра “Ҳар бир оила - тадбиркор” дастури доирасида 15 нафар фуқарога ажратилган жами 397,3 млн. сўмлик имтиёзли кредит маблағларини деҳқон хўжалиги ҳисоб рақамига ўтказиб, фуқароларга нақдлаштириб бериши натижасида ушбу маблағлар мақсадсиз сарфланган.

Шунингдек, Х.А. 2021 йилда 3 нафар яқин таниши номига деҳқон хўжаликлари ташкил қилиб, уларни ҳам банк таъминотчиси сифатида рўйхатдан ўтказган ва “Ҳар бир оила - тадбиркор” дастури доирасида 71 нафар фуқарога ажратилган жами 2 млрд. 182 млн. сўмлик имтиёзли кредит маблағларини ушбу хўжаликлар орқали нақдлаштириб бериши натижасида мазкур маблағлар мақсадсиз сарфланган.

Бундан ташқари, 2020 йилда 10 нафар фуқаронинг номига уларнинг хабардорлигисиз ҳужжатларни сохталаштириш йўли билан мини печлар харид қилиш учун 60 млн. сўм миқдорида кредит ажратилишига эришган ва уларни ҳам ўзига тегишли таъминотчи деҳқон хўжалиги ҳисобига ўтказиб, талон-тарож қилган.

Мазкур ҳолат юзасидан Жиноят кодексининг 167, 205 ва 209-моддалари билан жиноят иши қўзғатилиб, тергов ҳаракатлари олиб борилмоқда.

 

Теги imtiyozli kredit naqdlashtirish Toshkent viloyati talon-toroj